Entrada relazada: propostas de Inverno

 Na etapa de Infantil damos moita importancia a como comeza a xornada. Por iso, cada día levamos a cabo a chamada entrada relaxada, un momento no que cada neno e nena se vai incorporando pouco a pouco á rutina de aula, respectando os seus tempos e necesidades.

Durante este inicio de mañá, o alumnado atopa propostas tranquilas que cambian cada semana. Son actividades ás que poden acceder libremente, movéndose polo espazo con autonomía, e que están orientadas a traballar a motricidade fina e a vida práctica: manipular, encaixar, trasvasar, ordenar, abrir e pechar… accións sinxelas pero cheas de aprendizaxe.

Este momento axúdanos a crear un ambiente sereno, favorece a concentración e facilita unha transición natural entre a chegada ao cole e o inicio das actividades máis dirixidas. A través da entrada relaxada fomentamos a autonomía, a calma e o benestar emocional, sentando as bases para unha xornada de aprendizaxe positiva.

Pouco a pouco, e ao seu ritmo, comezamos cada día aprendendo 🌱.

🍕Cociñamos pizza aprendendo paso a paso

 Na etapa de Infantil seguimos aprendendo a través do xogo e das experiencias prácticas. Nesta ocasión, puxémonos o mandil e cociñamos pizza, unha actividade que encantou aos nenos e nenas.

Antes de comezar, falamos dos ingredientes que iamos empregar e dos utensilios precisos, traballando así o vocabulario e familiarizándonos cos elementos da cociña. Despois analizamos o proceso paso a paso, reflexionando sobre a orde das accións e traballando a estruturación temporal: que facemos primeiro, que vai despois e cal é o último paso.

Durante a elaboración tamén prestamos atención ás cantidades, contando, medindo e repartindo ingredientes, convertendo a cociña nun espazo cheo de aprendizaxe matemática, lingüística e sensorial.

Foi unha experiencia moi completa, na que os nenos e nenas aprenderon, colaboraron e, por suposto, desfrutaron moito do resultado final. Seguiremos cociñando e aprendendo xuntos! 🍽️😊

Xogamos co vocabulario de Inverno👏

 Na aula de Infantil seguimos descubrindo e aprendendo a través do xogo. Nesta ocasión realizamos unha actividade na que traballamos o vocabulario do inverno, achegándonos ás palabras propias desta estación dun xeito dinámico e participativo.

Nomeamos diferentes elementos relacionados co inverno e, a partir deles, traballamos a conciencia silábica. Acompañamos cada palabra con palmadas, marcando as sílabas, e empregamos tamén elementos manipulativos que nos axudaron a visualizar e comprender mellor a estrutura das palabras.

Este tipo de propostas favorecen o desenvolvemento da linguaxe oral, a atención e a escoita activa, ao tempo que sentan as bases para a futura lectoescritura. Aprender vocabulario, xogar cos sons e co ritmo das palabras convértese así nunha experiencia divertida e significativa.

Propostas arítsicas de Inverno❄️🎨

Na aula dos máis pequenos deixámonos levar pola maxia do inverno a través da arte. Nesta ocasión realizamos dúas propostas artísticas inspiradas nesta estación do ano, experimentando con cores, texturas e moita creatividade.

A primeira actividade foi a creación dun paisaxe invernal. Pintamos un soporte utilizando tons azuis e brancos e, unha vez seco, aplicamos cola branca e sal para simular a neve. O resultado foi unha experiencia sensorial moi enriquecedora, na que os nenos e nenas descubriron novas texturas e efectos visuais mentres daban forma ás súas creacións.

A segunda proposta consistiu en pintar e decorar copos de neve para adornar as fiestras da nosa aula. Primeiro pintámolos empregando cores propias do inverno, como azuis, branco e violeta, e despois personalizámolos con pegatinas, fomentando a expresión creativa e a motricidade fina.

Deste xeito,seguimos aprendendo a través da arte, explorando as estacións do ano e enchendo a aula de cor… mesmo no inverno! 

Aprendemos seguridade viaria sobre rodas 🚗🚦

No colexio vivimos unha xornada moi especial dedicada á educación viaria, na que a aprendizaxe se combinou coa diversión e a actividade física.

Para esta ocasión, preparouse no pavillón un circuíto de seguridade viaria, con sinais e percorridos adaptados á idade do alumnado. Cada neno e nena trouxo da casa a súa bicicleta/patinete/patíns, o que fixo a actividade aínda máis motivadora e ilusionante para todos.

Ao longo do circuíto, o alumnado puido practicar normas básicas de circulación, aprender a respectar os sinais e comprender a importancia de desprazarse de forma segura, tanto como peóns como condutores de vehículos sen motor. Todo isto nun contorno controlado e acompañados polo profesorado.

Esta actividade non só fomentou hábitos de mobilidade segura e responsable, senón tamén  valores como o respecto, a atención e a convivencia. Sen dúbida, foi unha experiencia moi enriquecedora que gozaron moito.

Seguimos aprendendo dun xeito activo e divertido!😀🚦

Xa temos estación metereolóxica no centro 🌈🌞⛅⛆

É un pracer comunicar ás familias que xa contamos nas nosas instalacións coa estación metereolóxica e o pluviómetro,dentro da nosa participación no programa Meteoscolas, do Plan Proxecta.

A partir deste momento comezaremos a medir e rexistrar diariamente as temperaturas máximas e mínimas, así como a cantidade de precipitación recollida co pluviómetro. Estes datos permitirannos traballar cunha información real e próxima, facilitando a observación directa e a aprendizaxe significativa do alumnado.

Grazas a este rexistro poderemos comparar os distintos meses do ano, analizar as diferenzas entre as estacións e observar como evoluciona o tempo ó longo do curso escolar.

Este proxecto achega ó alumnado ó coñecemento da metereoloxía dun xeito práctico e motivador, fomentando a curiosidade científica, a observación e o traballo con datos reais.

Seguiremos compartindo neste espazo os avances e resultados do noso traballo.

Comeza a nosa aventura metereolóxica!🌈🌞⛅⛆

Xogamos cos sons para achegarnos á lectoescritura📚✨

Na etapa de Infantil achegámonos á lectoescritura dun xeito manipulativo, lúdico e adaptado ás idades temperás. Nesta ocasión realizamos unha actividade na que os nenos e nenas traballaron cos articulemas dos sons, acompañados de elementos en miniatura que podían manipular.

A través do xogo, escoitamos, nomeamos e identificamos o son inicial das palabras, clasificando os diferentes obxectos segundo o fonema polo que comezan. Este tipo de propostas permiten desenvolver a conciencia fonolóxica, unha habilidade clave no proceso de aprendizaxe da lectura e da escritura.

Traballar os sons dende idades temperás axuda aos nenos e nenas a escoitar con atención, diferenciar sons e establecer relacións entre a linguaxe oral e escrita, sentando as bases para futuras aprendizaxes dun xeito natural e significativo.

Aprendemos xogando, manipulando e descubrindo… así medramos en Infantil!