🌦️🏃 MeteoEscolas: o tempo tamén se move co corpo

Dentro da sección “MeteoEscolas”, na área de Educación Física, o alumnado participou nunha actividade moi creativa na que o tempo atmosférico se converteu en movemento, expresión e imaxinación.

A proposta consistiu en que os nenos e nenas inventasen posturas corporais inspiradas en diferentes fenómenos meteorolóxicos. A partir da súa creatividade, pensaron nomes orixinais para cada creación, decidiron como debía ser a postura e definiron os pasos necesarios para poder representala.

Posteriormente, cada grupo explicou ao resto de compañeiros e compañeiras a súa proposta, guiándoos na súa execución e converténdose en pequenos e pequenas “mestres do tempo”, capaces de transformar a choiva, o vento ou o sol en movementos do corpo.

Foi unha actividade moi divertida na que se combinou a expresión corporal, o traballo en equipo e a imaxinación, reforzando ao mesmo tempo o coñecemento sobre os fenómenos meteorolóxicos dun xeito lúdico e participativo.

Unha maneira diferente de aprender o tempo… poñéndoo en acción co noso corpo! 🌈💨☀️

🐜 Un novo recuncho de natureza na biblioteca

 

Na nosa biblioteca escolar estreamos un novo e ilusionante recuncho dedicado á natureza: ¡xa recibimos os nosos formigueiros!

Este novo recurso convértese nunha ferramenta educativa de gran valor, xa que permite ao alumnado observar de preto o fascinante mundo das formigas. A través da súa observación, poderán aprender sobre a organización das colonias, o traballo en equipo e o comportamento destes pequenos insectos, desenvolvendo ao mesmo tempo a curiosidade científica e o respecto polo medio natural.

Ademais, este proxecto implica unha participación activa por parte dos nenos e nenas, que serán os encargados do coidado dos formigueiros. Entre as súas tarefas estará garantir as condicións adecuadas para as formigas, como achegar a humidade necesaria para o seu benestar, converténdose así en pequenos coidadores da natureza.

Este recuncho non só enriquecerá a nosa biblioteca, senón que tamén fomentará valores como a responsabilidade, o compromiso e o aprendizaxe a través da experiencia directa.

Sen dúbida, trátase dunha iniciativa apaixonante que nos permitirá seguir descubrindo e valorando o mundo natural desde dentro do propio centro.

Novo espazo sensorial de luz na Biblioteca Creativa ✨

Esta semana estreamos na nosa Biblioteca Creativa un novo recuncho pensado para a exploración, a curiosidade e a experimentación: un espazo sensorial de luz. Neste lugar, o alumnado pode descubrir como a luz transforma os materiais e crear pequenos xogos visuais cheos de cor, reflexos e movemento.

O espazo está equipado con diferentes recursos que invitan a observar e manipular. Entre eles destacan os materiais fluorescentes para luz negra, que revelan cores sorprendentes cando se iluminan con esta luz especial. Figuras, pezas traslúcidas e obxectos fluorescentes permiten experimentar e comprobar como cambian os tons e as formas segundo a iluminación.

Outro dos elementos que máis chama a atención é o espello infinito, que crea un efecto visual fascinante no que as luces parecen multiplicarse sen fin. A través del, o alumnado pode explorar conceptos como a reflexión e a percepción visual dun xeito lúdico e sorprendente.

Completando o ambiente, contamos tamén cunha lámpada de peixes con burbullas, que achega movemento, cor e unha atmosfera relaxante. As luces e o suave ascenso das burbullas crean un ambiente tranquilo que invita á observación e á calma, favorecendo tamén momentos de concentración e benestar.

Este novo espazo nace co obxectivo de estimular os sentidos, fomentar a curiosidade científica e promover a aprendizaxe a través da experimentación. A luz convértese así nunha ferramenta para descubrir, crear e imaxinar.

Na Biblioteca Creativa seguimos abrindo portas a novas formas de aprender… explorando, tocando e deixando que a curiosidade ilumine cada descubrimento. 💡

Sabores e saberes🥘🍞

 No día de hoxe quixemos conmemorar o Día da Muller dunha forma moi especial: recibimos a visita de mulleres de A Limia que nos contaron sobre as súas receitas tradicionais e costumes da nosa contorna 

Os nenos e nenas puideron escoitar historias reais, descubrir ingredientes e pratos de sempre, e aprender como a cultura e a cociña van da man. Foi unha actividade moi interesante, na que todos descubrimos que a tradición culinaria tamén nos conecta con persoas, historias e momentos especiais da nosa comunidade 🌿❤️.

Grazas a todas as mulleres que nos ensinaron que aprender sobre cociña e tradición pode ser divertido e inspirador para todos! 👩‍🍳✨

Reorganizamos a nosa biblioteca 📚

Nos últimos meses, o profesorado estivo traballando na reorganización da colocación dos libros da nosa biblioteca co obxectivo de facer este espazo aínda máis accesible e funcional para todo o alumnado.

Para levar a cabo esta tarefa seguimos o modelo da CDU adaptada ás bibliotecas escolares de Galicia (Clasificación Decimal Universal), un sistema que organiza os libros segundo a súa temática. Este modelo utiliza o coñecido sistema dos “autobuses”, no que cada número representa unha gran área de coñecemento: natureza, ciencia, arte, historia, literatura, entre outras. Grazas a esta organización, os libros quedan agrupados por temáticas, o que facilita moito a súa busca e permite que o alumnado poida orientarse mellor dentro da biblioteca.

Un dos grandes beneficios desta nova colocación é que favorece a autonomía do alumnado. Agora resulta máis sinxelo atopar libros sobre un tema concreto e tamén devolvelos ao lugar correspondente despois da lectura.

Pensando especialmente no noso alumnado máis pequeno, creamos tamén etiquetas con apoios visuais que acompañan a cada sección. Deste xeito, mesmo sen saber ler completamente, poden identificar as diferentes temáticas e escoller libros que lles interesen. Ademais, estas referencias visuais axúdanlles a saber onde deben colocar os libros cando rematan de utilizalos.

Para presentar esta nova organización, reunímonos todos e todas na nosa biblioteca. Durante o encontro, o alumnado de primaria encargouse de facer un recordatorio do funcionamento da biblioteca, explicando as normas de uso, os diferentes espazos e algúns dos recursos que podemos atopar nela.

Tamén aproveitaron a ocasión para explicar aos compañeiros e compañeiras máis pequenos esta nova reorganización, amosando como están colocados agora os libros e como podemos buscar as diferentes temáticas.

Foi un momento de aprendizaxe compartida no que o alumnado maior exerceu de guía, axudando aos máis pequenos a coñecer mellor este espazo tan importante do centro.

Con esta nova organización, a nosa biblioteca convértese nun lugar aínda máis accesible, ordenado e pensado para que todos e todas poidamos descubrir novas lecturas con facilidade. 📖✨

Mulleres da Limia: historias que inspiran 💜

Con motivo da conmemoración do 8 de marzo, Día Internacional da Muller, o alumnado de 3º, 4º, 5º e 6º de Educación Primaria participou nunha actividade moi especial na que tivemos a sorte de contar coa visita de mulleres da Limia que compartiron con nós as súas experiencias de vida.

Durante o encontro, estas mulleres relatáronnos en primeira persoa as súas historias, ofrecéndonos unha valiosa oportunidade para escoitar e coñecer de preto o seu percorrido vital, as súas aprendizaxes e o seu papel dentro da comunidade.

Moitas delas participaron tamén no libro “Sabores e saberes”, un proxecto que recolle receitas, tradicións e lembranzas que forman parte da nosa cultura. A través deste traballo, contribúen a conservar e transmitir a memoria, os coñecementos e as tradicións da nosa terra.

Para o noso alumnado foi unha experiencia moi enriquecedora, xa que puideron coñecer referentes próximos, mulleres que, desde o seu día a día, axudaron a construír comunidade e a manter vivas moitas das nosas tradicións.

Actividades como esta permítennos dar valor á experiencia e á memoria das persoas que nos rodean, ao mesmo tempo que achegan ao alumnado exemplos reais de esforzo, sabedoría e compromiso coa cultura.

Agradecemos sinceramente a estas mulleres por compartir con nós o seu tempo, as súas historias e os seus saberes, convertendo esta xornada nun momento de aprendizaxe e encontro moi especial. 

Queremos tamén agradecer ao CDR O Viso por compartir con nós esta actividade e por facer posible este encontro tan enriquecedor para o noso alumnado.💜

8M: As nosas mulleres referentes 💜

Con motivo da conmemoración do 8 de marzo, Día Internacional da Muller, o alumnado máis pequeno de Educación Infantil e 1º de Primaria participou nunha actividade moi especial para reflexionar sobre as mulleres importantes das súas vidas.

Para comezar, mantivemos unha pequena conversa na aula na que cada neno e cada nena puido pensar e compartir quen é a muller máis importante para el ou para ela e por que. Xurdiron nomes moi significativos: nais, avoas, irmás, tías… mulleres que forman parte do seu día a día e que son referentes de coidado, apoio e cariño.

Despois deste momento de reflexión, o alumnado realizou un debuxo da súa muller referente, plasmando no papel esa persoa tan especial. Para completar a actividade, colocaron o seu debuxo nun pequeno cadro elaborado con depresores, que previamente decoraron con flores violetas.

Estas flores representan as sempre vivas, un símbolo moi ligado ao 8M, que nos lembra a importancia de manter vivos valores como a igualdade, o respecto e o recoñecemento ao papel das mulleres na sociedade.

O resultado foi unha fermosa colección de cadros cheos de significado, nos que cada debuxo conta unha historia e reflicte o cariño e a admiración que o alumnado sente polas súas mulleres referentes.

Unha actividade sinxela, pero chea de emoción, que nos permitiu celebrar o 8M poñendo en valor ás mulleres que forman parte das nosas vidas. 💜